በአዲስ አበባ ከተጠራው ሰልፍ ጋር በተያያዘ 4 አስተባባሪዎች እና 97 ሰዎች ታሰሩ Leave a comment

በመጪው እሁድ ኅዳር 30/2016 ዓ.ም. በአዲስ አበባ ከተማ ይካሄዳል የተባለውን ሰላማዊ ሰልፍ ከሚያስተባብሩት ፖለቲከኞች መካከል አራቱ በፖሊስ መያዛቸው ሲነገር፣ ከዚሁ ጋር በተያያዘ 97 ሰዎች በቁጥጥር ስር መዋላቸውን መንግሥት አስታወቀ።

ከሰልፉ አስተባባሪዎች ውስጥ አራቱ ሐሙስ ኅዳር 27/2016 ዓ.ም. በቁጥጥር ስር የዋሉት ሊካሄድ የታቀደውን ሰላማዊ ሰልፍ “ለማስቀረት ነው” የሚል ጥርጣሬ እንዳላቸው ከሰልፉ አስተባባሪዎች አንዱ የሆኑት የኢትዮጵያ ሕዝባዊ አብዮታዊ ፓርቲ (ኢሕአፓ) ሊቀመንበር ረዳት ፕሮፌሰር ዝናቡ አበራ ለቢቢሲ ተናግረዋል።

ከአስተባባሪዎቹ መታሰር በኋላ ምሽት ላይ ከፀጥታ እና ደኅንነት የጋራ ግብረ ኃይል የወጣ መግለጫ “በሰላማዊ ሰልፍ ሽፋን አዲስ አበባ ውስጥ ሁከት እና ብጥብጥ ለመፍጠር በኅቡዕ ሲንቀሳቀሱ የነበሩ ቡድኖች ሴራ መክሸፉን” ገልጾ፣ በዚህም 97 ተጠርጣሪዎች በቁጥጥር ስር መዋላቸውን አስታውቋል።

ነገር ግን በፀጥታ ኃይሉ ከተያዙት ሰዎች መካከል አራቱ የሰልፉ አስተባባሪዎች ስለመኖራቸው ያለው ነገር የለም።

ሐሙስ ጠዋት ከታሰሩት አስተባባሪዎች ውስጥ የኢሕአፓ ተቀዳሚ ምክትል ሊቀመንበር መጋቢ ብሉይ አብርሃም ሃይማኖት እና የቀድሞ የኢትዮጵያ ዜጎች ለማህበራዊ ፍትህ (ኢዜማ) አባል አቶ ናትናኤል መኮንን እንደሚገኙበት የሰልፉ አስተባባሪዎች የሆኑት አቶ የሺዋስ አሰፋ እና ረዳት ፕሮፌሰር ዝናቡ ለቢቢሲ አረጋግጠዋል።

በተጨማሪም በቅርቡ የመሥራች ጠቅላላ ጉባኤውን ያካሄደው የትንሳኤ ሰባ እንደርታ ፓርቲ አመራሮች አቶ ጊደና መድኅን እና አቶ ካልኣዩ መሐሪም በዛሬው ዕለት የታሰሩት ሌሎች የሰልፉ አስተባባሪዎች እንደሆኑም ገልጸዋል።

ከፀጥታ እና ደኅንነት የጋራ ግብረ ኃይሉ በመግለጫው እንዳለው ወደ አዲስ አበባ ከተማ “የታጠቁ ኃይሎችን እና ቡድኖችን አስርጎ የማስገባት ሙከራ መደረጉን እና በሰልፍ ሽፋን ሁከት እና ግርግር” ለመፍጠር ዕቅድ “ተልዕኮ የወሰዱ 97 ተጠርጣሪዎች” መያዙን አመልክቷል።

ጨምሮም በአማራ እና በኦሮሚያ ክልሎች ያሉ ታጣቂዎችን ሴራ ለማክሸፍ በአዲስ አበባ የተለያዩ አካባቢዎች ድንገተኛ ፍተሻ መካሄዱን እና “ከፀረ–ሰላም ኃይሎች ጋር በትብብር የሚሠሩ” ያላቸው ተጠርጣሪዎችን ከጦር መሳሪያዎች እና ከመገናኛ ሬዲዮዎች ጋር በቁጥጥር ስር ውለዋል ብሏል።

ግብረ ኃይሉ በአማራ እና በኦሮሚያ ክልሎች በአንዳንድ አካባቢዎች የሚንቀሳቀሱት ኃይሎች በስም ያልጠቀሳቸው ነገር ግን “የውጭ ኃይሎች” ባላቸው ወገኖች አገር ለማፍረስ ይደገፋሉ በማለት የቀሩትንም ለመያዝ ዘመቻው እንደሚቀጥል ገልጿል።

በቁጥጥር የዋሉት አራቱ የሰልፉ አስተባባሪዎች በፖሊስ ቁጥጥር የዋሉት ከተለያዩ ቦታዎች መሆኑን የሚያስረዱት የኢሕአፓ ሊቀመንበር፤ አራቱም በአዲስ አበባ ሜክሲኮ አካባቢ በሚገኘው የፌደራል ፖሊስ ወንጀል ምርመራ ቢሮ እንደሚገኙ ተናግረዋል።

አራቱ ፖለቲከኞች እስካሁን ደረስ “ቃል ስላልሰጡ” በምን ምክንያት በቁጥጥር ስር እንደዋሉ እንዳልታወቀ ረዳት ፕሮፌሰር ዝናቡ ተናግረዋል።

ቢቢሲ የአራቱን ፖለቲከኞች የእስር ምክንያት በተመለከተ ከፌደራል ፖሊስ መረጃ ለማግኘት ያደረገው ጥረት አልተሳካም።

የፌደራል ፖሊስ ኮሚሽን ቃል አቀባይ ጄይላን አብዲ ስለ እስሩ ለቀረበላቸው ጥያቄ “መረጃ የሚሰጠው የአስቸኳይ ጊዜ አዋጅ ኮማንድ ፖስት ነው” የሚል ምላሽ ሰጥተዋል።

የኢህአፓ ሊቀመንበር ረዳት ፕሮፌሰር ዝናቡ ግን ፖለቲከኞቹ የታሰሩት በአስተባባሪነት እየተሳተፉበት ያለውን እና ለእሁድ ዕለት የተጠራውን ሰላማዊ ሰልፍ ለማስቀረት ነው የሚል ጥርጣሬ እንዳላቸው አስረድተዋል።

ከአራት ኪሎ ተነስቶ በመስቀል አደባባይ እንዲጠናቀቅ የተጠራው ሰልፍ ሦስት ዋነኛ ዓላማዎች እንዳሉት 12 የሰልፉ አስተባባሪዎች ከፊርማቸው ጋር ለአዲስ አበባ ከተማ ከንቲባ ጽህፈት ቤት ያስገቡት ደብዳቤ ያስረዳል።

አስተባባሪዎቹ በዋናነት የጠቀሱት ዓላማ፤ በአማራ እና ኦሮሚያ ክልሎች “ደም አፋሳሽ ተግባር ውስጥ” ይገኛል ያሉት የመከላከያ ሠራዊት “ያለምንም ቅድመ ሁኔታ ወደ ጠቅላይ ጦር ሰፈሩ እንዲገባ ለመጠየቅ” የሚለው ይገኝበታል።

በአዲስ አበባ፥ በኦሮሚያ እና ሲዳማ ክልሎች “ያለ ምንም ምክንያት” የታሰሩ የአማራ ተወላጆች ከእስር እንዲፈቱ መጠየቅም ከሰልፉ ዓላማዎች መካከል ተጠቅሷል።

አስተባባሪዎቹ በሦስተኛነት የጠቀሱት የሰልፍ ዓላማ በተለያዩ የአገሪቱ ክፍሎች የሚገኙ ተፈናቃዮች “በአስቸኳይ ወደቀያቸው እንዲመለሱ መጠየቅ” የሚለውን ነው።

አስተባባሪዎቹ ይህንን ሰልፍ እንደሚያካሂዱ ካስታወቁ በኋላ የአዲስ አበባ ፖሊስ ኮሚሽን ጠርቶ እንዳነጋገራቸው የኢሕአፓ ሊቀመንበሩ ተናግረዋል።

“የአዲስ አበባ ፖሊስ ኮሚሽነር ጠርቶ ሰልፉ መካሄድ እንደሌለበት፤ ምንም ጥበቃ እንደማያደርግልን ነግሮን ነበር” ሲሉ ከከተማዋ ፖሊስ ተሰጠን ያሉትን ምላሽ ገልጸዋል።

ቢቢሲ፤ ለአዲስ አበባ ፖሊስ ኮሚሽን የሕዝብ ግንኙነት ዳይሬክተር ምክትል ኮማንደር ማርቆስ ታደሰ ያደረገው የስልክ ጥሪ ምላሽ ባለማግኘቱ ተሰጠ የተባለውን ምላሽ ማረጋገጥ አልቻለም።

ከዛሬው የአራቱ የሰልፉ አስተባባሪዎች እስር በኋላ ለመጪው እሁድ የተጠራው ሰልፍ ላይ የዕቅድ ለውጥ ይኖር እንደሆነ ጥያቄ የቀረበላቸው የሰልፉ አስተባባሪ እና የኢሕአፓ ሊቀመንበር ረዳት ፕሮፌሰር ዝናቡ “ከ12 [የሰልፉ] አስተባባሪዎች የቀረነው ገና አልተገናኘንም። ተገናኝተን፣ ሊሆኑ የሚችሉ ሁኔታዎችን አስቀምጠን ምን ማድረግ እንዳለብን ውሳኔ ላይ እንደርሳለን” ብለዋል።