አሜሪካ ለዩክሬን የምትሰጠውን ወታደራዊ እርዳታ አቋረጠች……. Leave a comment

አሜሪካ ለዩክሬን የምትሰጠውን ወታደራዊ እርዳታ ማቋረጧን የዋይት ሐውስ ባለስልጣናት በአሜሪካ የቢቢሲ አጋር ለሆነው ሲቢኤስ ኒውስ አረጋገጡ።

አንድ የዋይት ሐውስ ባለስልጣን “ፕሬዝዳንቱ ሙሉ ትኩረታቸው ሰላም ላይ ነው። አጋሮቻችንም እዚህ ግብ ላይ እንዲያተኩሩ እንፈልጋለን። የምናደርገውን እርዳታ ለጊዜው አቁመን ለመፍትሄው የሚኖረውን አበርክቶ መለስ ብለን ለመፈተሽ እንፈልጋለን” ብለዋል።

ብሉም በርግ በበኩሉ ፕሬዝዳንት ትራምፕ ለዩክሬን የሚሰጡ ማንኛውንም የወታደራዊ ድጋፎች ሙሉ በሙሉ ለጊዜው ማቋረጣቸውን አረጋግጧል።

እንደ ብሉም በርግ ዘገባ ከሆነ በአሁኑ ወቅት ዩክሬን ያልደረሱ ወታደራዊ መሳርያዎች፣ፖላንድ ወደሚገኘው ወታደራዊ ግምጃ ቤት እየተጓጓዘ የሚገኙ መሳርያዎችን ጨምሮ በአጠቃላይ እንዲቆሙ ሆነዋል።

የአሜሪካ የውጪ ጉዳይ ሚኒስትር ማርኮ ሩቢዮ ባወጡት መግለጫ “ፕሬዚዳንት ትራምፕ በአሁኑ ጊዜ በዩክሬን ያለውን ጦርነት ዘላቂ በሆነ ሁኔታ ለመፍታት እድል ያላቸው በዓለም ላይ ብቸኛው መሪ ናቸው” ብለዋል።

“ሩሲያውያንን ወደ ድርድር ጠረጴዛ ማምጣት እንፈልጋለን። ሰላም ይቻል እንደሆነ ማጣራት እንፈልጋለን።” ብለዋል በመግለጫቸው ላይ።

በጉዳዩ ላይ ፕሬዝዳንቱም ሆኑ ፔንታጎን እስካሁን ድረስ አስተያየታቸውን አልሰጡም።

ብሉምበርግ እና ፎክስ ኒውስ የወታደራዊ እርዳታው እገዳ ፕሬዝዳንት ዜሌንስኪ ለዋሺንግተን “ለሰላም ዝግጁ” መሆናቸውን እስኪያሳዩ ድረስ እንደሚቀጥል ባለስልጣናትን ጠቅሰው ዘግበዋል።

የትራምፕ አስተዳደር ለኪየቭ የሚሰጠውን የደህንነት መረጃም ለመቀነስ መወሰኑን ሲኤን ኤን ዘግቧል።

ይህ ዜና የተሰማው ባለፈው ሳምንት ዶናልድ ትራምፕ እና የዩክሬኑ ፕሬዝዳነት ቮሎዲሚር ዜሌንስኪ በዋሺንግተን ተገናኝተው ከተወያዩ በኋላ ነው።

ውይይቱ በሁለቱ መሪዎች መካከል የጋለ ክርክር የተደረገበት እና ኃይለ ቃል የተቀላቀለበት ነበር።

ዲሞክራቱ እና የወታደራዊ አገልግሎት ኮሚቴ ውስጥ አባል የሆኑት ታሚ ደክወርዝ የዋይት ሐውስን ውሳኔ “አሳፋሪ እና ዩክሬንን የነጠለ” ሲሉ ተችተዋል።

በማሕበራዊ ሚዲያ ገጻቸው ላይም “ውሳኔው አገራችንን ደህንነቷ የተጠበቀ አያደርገውም” ብለዋል።

አክለውም “ፑቲንን እና ጠላቶቻችንን የልብ ልብ ሲሰጥ የዲሞክራሲ አጋሮቻችንን ጋር ያለንን ወዳጅነት ያዳክማል” ብለዋል።

ሌላኛው ዲሞክራት ፒተር ዌልች ደግሞ “ፑቲክ የጦር ወንጀለኛ ነው። ትራምፕ ደካማ ነው” ሲሉ ቅሬታቸውን ገልጸዋል።