በሎስ አንጀለስ ሰደድ እሳት የተጎዱ ሰዎችን የምትረዳው ትውልደ ኢትዮጵያዊት…… Leave a comment

ከንፋሱ መነሳት በፊት በከተማው ዳርቻ እየተቃጠሉ ያሉትን የፓሊሳድስ እና ኢተን እሳቶች በመቆጣጠር ረገድ የተወሰነ ለውጥ ታይቷል።

“የእሳት አደጋ ተከላካዮች የሰዎችን ሕይወት ለማዳት ሲሞክሩ ነበር። ባልታሰበ ሰዓት ስለተነሳ ብዙዎች ዕቃ ይቅር እና ሰነዶች ይዞ ለመውጣት አልቻሉም” ትላለች ትዕግስት።

“በጣም አስደንጋጭ ነው። ባየኋቸው ብዙ ቦታዎች በርካቶች ያለ ምንም ነገር ነው የቀሩት” ስትልም ያለውን አስከፊ ሁኔታ ገልጻለች።

በሎስ አንጀለስ ዙሪያ ሦስት አካባቢዎች መቃጠላቸውን የቀጠሉ ሲሆን፣ ትዕግስት ከልጆቿ ጋር በመሆን በእሳት አደጋው ለተጎዱ ሰዎች ድጋፍ መስጠቷን ትናገራለች።

“የተጎዱ ኢትዮጵያውያን አላገኘሁም። እዚህ ላሉ አሜሪካውያን ነው ድጋፍ የሰጠነው” ብላለች።

ትዕግስት ከዚህ ቀደም በደብረ ብርሃን እና በሌሎችም አካባቢዎች እርዳታ በመስጠት ትታወቃለች። አሁንም በወሎ አካባቢ ረሃብ ለተጎዱ ሰዎች እርዳታ ለመስጠት ድርጅት መሥርታለች።

“ሰው ስለሚረባረብ የምግብ እና መድኃኒት እጥረት የለም። እንዲያውም ውሃ በዝቶ ማስቀመጫ ቦታ ስላልነበረ መለስኩት። የሕጻናት ምግብ እና የንጽሕና መጠበቂያ ያስፈልግ ስለነበር እነሱን ሰጥቻለሁ” ትላለች ትዕግስት።

“ለመርዳት ተሰልፈን ነው የነበረው። ብዙ ሰው ነው ለመርዳት የወጣው። ለመረዳት ሳይሆን ለመርዳት ነው ሰው የወጣው። የደብረ ብርሃን ሁኔታን አስታውሼ የሁለቱ ተቃራኒ መሆን ስሜታዊ አደረገኝ” ስትልም ስሜቷን ገልጻለች።

ኃይለኛ ንፋስ እና የዝናብ አለመኖር ሰደድ እሳቱን እንዳባባሰው ተገልጿል። የአየር ንብረት ለውጥ ከሰደድ እሳቱ ጀርባ እንዳለም ባለሙያዎች ተናግረዋል።

ትዕግስት “ልጆቼ ተወልደው ያደጉባት እና እኔም የምኖርባት አገር ስለሆነች የአቅሜን ማድረግ አለብኝ” ትላለች።

ልጆቿ በእርዳታው እንዲሳተፉ ያደረገችበትን ምክንያትም “ልጆቼ ከልጅነታቸው ጀምሮ ለኢትዮጵያ እና ለኢትዮጵያዊ ነው ስረዳ የሚያውቁኝ። እነሱም ያግዙኛል። በተወለዱበት አሜሪካ ችግር ሲገጥም መርዳት እንዳለብን እንዲያውቁ ነው። ወገናዊነቴ እና ሰብአዊነቴ ለሁሉም ሰዎች እኩል መሆኑን እንዲያውቁ ነው” ስትል ገልጻለች።

ኢትዮጵያዊት-አሜሪካዊቷ ትዕግስት ፈረደ ቀድሞ የፋሽን ዲዛይነር የነበረች ሲሆን፣ አሁን በሎስ አንጀለስ የራሷ ንግድ አላት።

“ሁሉም ሰብአዊ ሰው ችግር ሲደርስ መረባረብ አለበት። ዛሬ ቢኖረኝ ነገ እንደማጣ አስባለሁ” የምትለው ትዕግስት፤ አብዛኞቹ በሰደድ እሳቱ የተጎዱ ሰዎች በጥሩ የኑሮ ደረጃ ላይ መሆናቸውን በመጥቀስ “በአንድ ቀን ቤት አልባ ሆነዋል” ትላለች።

በእርስ በእርስ ጦርነት እንዲሁም በረሃብም የሚሞቱ ኢትዮጵያውያንን ለመደገፍም ኢትዮጵያውያን እንዲረባረቡም ታሳስባለች።

የካሊፎርኒያ የእሳት አደጋ ባለሥልጣናት እንዳስታወቁት ቢያንስ በአምስት አካባቢዎች እሳቱ ተከስቷል። እነዚህም፦

ፓሊሳዴስ: የመጀመሪያው እሳት ማክሰኞ የተነሳበት ትልቁ እሳት ሲሆን፣ በግዛቲቱ ታሪክ በጣም አውዳሚው እሳት ሊሆን ይችላል። ከፍተኛውን የፓሲፊክ ፓሊሳዴስ ሰፈርን ጨምሮ ወደ ከስምንት ሺህ ሔክታር በላይ የሚጠጋ አካባቢን አውድሟል።

ኢተን፡ ይህኛው እሳት የሎስ አንጀለስን ሰሜናዊ ክፍል አጥቅቷል። እንደ አልታዴና ያሉ ከተሞችን በእሳቱ እየወደሙ ነው። ወደ 5665 ሔክታር የሚጠጋ አካባቢን የሚያቃጥለው እሳት በአካባቢው ሁለተኛው ትልቁ እሳት ነው።

ኸረስት፡ ከሳን ፈርናንዶ በስተሰሜን የሚገኘው አካባቢ ማክሰኞ ምሽት መቃጠል ጀመረ። ወደ 271 ሔክታር የተስፋፋ ሲሆን፣ የእሳት አደጋ ተከላካዮች ለመቆጣጠር ሥራ ጀምረዋል።

ሊዲያ፡ ረቡዕ ከሰዓት በኋላ ከሎስ አንጀለስ በስተሰሜን በምተገኘው ተራራማው አክቶን አካባቢ እሳቱ ተከሰተ። ወደ 141 ሔክታር የሚጠጋ አካባቢን አዳርሷል። 60 በመቶው እሳት በቁጥጥር ስር መዋሉን ባለሥልጣናት ተናግረዋል።

ኬኔት፡ ይህ አዲስ እሳት ሐሙስ ዕለት በሎስ አንጀለስ እና በቬንቹራ አውራጃዎች ድንበር ላይ ተቀሰቀሰ። እስካሁን ወደ 404 ሔክታር አካባቢን አዳርሷል።

ቀደም ሲል የሰንሴት፣ ዉድሊ እና ኦሊቫስ እሳቶችን በቁጥጥር ስር ማዋል ተችሏል።

በድህረ ገጻችን ኢትዮ አማዞን በመግባት የሚፈልጉትን እቃ ማዘዝ  ብቻ  ሳይሆን የርስዎንም እቃዎች መሸጥ እንደሚችሉ ስናሳውቅዎት በደስታ ነው ። ለማስታወቂያ ወይንም ለመግቢያ ምንም ክፍያ አይጠበቅብዎትም፤  ለተጨማሪ መረጃ   ድህረ ገጻችንን ይጎብ/ኙ። https://ethio-amazon.com/

ለበለጠ መረጃ ሊንኩን በመንካት የቴሌግራም ግሩፓችንን ይቀላቀሉ!https://t.me/ethioamazon

ምንጭ፡– (ቢቢሲ)