“የሳትናቸው ኳሶች የማይታመኑ ናቸው” – በዩናይትድ ከኤፍ ኤ ዋንጫ የተሰናበተው አርሰናል አሰልጣኝ ምን ይላሉ? Leave a comment

በኤፍ ኤ ዋንጫ በ10 ተጫዋቾች ለመጨረስ የተገደደው ዩናይትድ በኤምሬትስ ስታድየም አርሰናልን በመርታት ወደ ቀጣዩ ዙር አልፏል።

ጨዋታው በፍፁም ቅጣት ምት የተጠናቀቀ ሲሆን ጆሹዋ ዘርክዚ የማሸነፊያውን ኳስ ከመረብ በማገናኘት የአርሰናልን የዋንጫ ሕልም አጨልሟል።

የዩናይትዱ ዲዮጎ ዳሎ በሁለተኛ ቢጫ ከሜዳ መሰናበቱን ተከትሎ ዩናይትድ በ10 ተጫዋቾች ጨዋታውን አጠናቋል።

በ52ኛው ደቂቃ ብሩኖ ፈርናንዴዝ ባስቆጠረው ጎል አማካይነት ዩናይትድ ጨዋታውን እየመራ ነበር።

ዳሎ ከሜዳ የተሰናበተው በ61ኛው ደቂቃ ነው። ከሁለት ደቂቃ በኋላ አርሰናል በጋብርኤል ጎል አቻ ማድረግ ቻሉ።

የመሐል ዳኛው አንድሩ ማድሊ የዩናይትዱ ተከላካይ ሃሪ ማጓየር የአርሰናሉ አጥቂ ካይ ሀቨርትዝ ላይ ጥፋት ፈፅሟል በማለት ለመድፈኞቹ ፍፁም ቅጣት ምት ሰጡ።

የፍፁም ቅጣት መሰጠቱን ተከትሎ የሁለቱ ቡድኖች ተጫዋቾች ለተወሰነ ደቂቃ ያክል ዱላ ቀረሽ ፍትጊያ ውስጥ ገብተው ነበር።

የአርሰናሉ አምበል ማርቲን ኦዴጋርድ የመታውን የፍፁም ቅጣት የዩናይትዱ ግብ ጠባቂ አልታይ ባይንዲር መልሶታል።

የሚኬል አርቴታ ቡድን በዴክላን ራይስ እና በሀቨርትዝ አማካይነት ጨዋታውን ማሸነፍ የሚያስችላቸው አጋጣሚ ቢያገኙም አስደናቂ ሆኖ ባመሸው ባይንዲር ከሽፎባቸዋል።

የአርሰናሉ አሰልጣኝ ሚኬል አርቴታ “የሳትናቸው ኳሶች የማይታመኑ ናቸው” ሲል አስተያየቱን ሰጥቷል።